اعمل ايه بعد التخرج ؟

 لازم أي حد بيتخرج يفهم طبيعة مراحل ما بعد التخرج

المرحله الأولي مرحلة التعلم الأساسيات، حياتنا كلها عبارة عن تعليم مستمر ولكن هنا مرحلة إنك تعرف أساسيات البيزنس وإن فيه فرق كبير بين اللي اتعلمته في الكليه وبين الحياه بشكل عام ودي مرحله كلها كورسات ودبلومات وقراءة كتب ودي ممكن تاخد سنه مثلا

المرحلة التانيه مرحلة التجربه، اللي هو أنا بجرب نفسي في أكتر من حاجه علشان أفهم إيه الوظيفة اللي أنا هاكمل فيها كمسار وظيفي لحياتي، ودي مرحله كلها تخبط ولخبطه وتجربه بس لو ماخدتهاش بدري هاتبهدلك مستقبلك فخدها في الأول أفضل

المرحلة الثالثة مرحلة بداية المسار الوظيفي، خلاص اتعلمنا بيئة العمل وظروف البيزنس وكمان استقرينا علي المهنة اللي هانشتغلها طول العمر طيب نعمل ايه بقي؟

نشتغل في شركة متوسطه علشان نتعلم وناخد فلوس وندي كل طاقتنا ومجهودنا في المقابل ونشتغل 12 ساعه في اليوم ونغلط وناخد علي دماغنا ونتعلم لحد ما نتقل ويبقي عندنا علم وسيرة ذاتية محترمه بتاخد من 3 ل 5 سنين

المرحلة الرابعه نترقي وناخد خطوة في مجال الإدارة حاجه كده زي تيم ليدر مبيعات أو نائب مدير حسابات، ودي مرحله بنكون فاهمين فنيا لكن بنتعلم إداريا ونعرف يعني ايه مسئوليات وفي نفس الوقت فيه مدير معانا بيعلمنا ويوجهنا إداريا ويحمينا من هجوم الإداره العليا ونرجعله في المشاكل، ودي مرحله برضه بتاخد من 3 ل 5 سنين

المرحله الخامسه ودي نقدر نسميها مرحلة الحصاد وهي إني أكون اشتغلت في مهنه بحبها فترة حوالي 10 سنين منها 3 سنين كمدير فمتمكن من المهنه دي فنيا وإداريا وبابدأ أختار إني أشتغل في شركة كبيرة ليها مميزات قوية وأدور علي ان اكون مستريح ماديا أو إني أبدأ مع شريك شركة ناشئة

طبعا ده الطريق الطبيعي اللي المفروض الناس تفكر فيه بشكل عملي واللي ممكن نقول إنه الطريق الطبيعي ل 80% من الناس اللي نجحت سواء بقي مشيوا بنفس الترتيب ده أو لأ

وطبعا الطريق ده ملوش علاقه بظروفك الشخصية بإنك معترض مثلا هو أنا اقعد أدرس بتاع 16 سنه وتيجي تقولي أصل انت هاتبدأ من الأول ماهو دي مشكله قائمة وهو اختلاف المناهج الدراسية عن سوق العمل، أو إنك عايز تخطب وترتبط فانا مش هاينفع أجرب سنتين تلاته علشان أهل خطيبتي هايضايقوا لما كل شوية أغير وظيفتي كل ده علي لكن ده مش هايغير حقيقة الوضع ولازم يبقي فيه تطور يوصلك في النهاية للي بتخططله